Vent, vent - det er berre advent

Då eg nemde for mor mi at eg synest denne løparen er så fin.  Då eg var lita, kunne eg ikkje tenke meg noko finare! Desse stiliserte englane er vel typisk 70-tal. Den tida levde vi ikkje i overflod som no. Det var ikkje mi meining å tigge, men no har altså duken kome hit.

Det er ein del snakk om julegåver for tida. Eg merkar meg at dei som er 10-15 år yngre enn osws nok kjøper dyrare gåver til sine born enn vi gjorde.  Ein gong på slutten av 70-talet erklærte systra mi at det vart ikkje jul viss ho ikkje fekk 64 crayola. Så hadde vi noko å plage henne med i adventstida. (Eg vil ha ein del av æra for at ho har vorte så tøff som ho er.)

Ho fekk fargestiftane og vart lykkeleg.  Tidlegare var det øskjer med 12 fargar i som var vanleg.  Var ein heldig, fekk ein 24 fargestiftar, då med finefargen (raudlilla) og froskefargen.  Moglegheitene vart fleire når ein skulle teikne og fargelegge. 

Jula handlar om tradisjonar.  Vi som har levd ei stund har mange minne, og så er vi med på å skape nye for andre!