lørdag 31. mars 2012

VANILJECUPCAKES

Her kjem oppskrifta på "cupcakesa" som vi laga torsdag kveld.  I dag har frøkna baka nye.  Ho brukte ei banankakeoppskrift som vi fann i Sverre Sætre si bok.  Ein kan i grunnen bruke alle formkakeoppskrifter.  Det er berre å fylle dei i små former og steike dei i 10-20 minutt alt etter temperaturen. 
 På kurset brukte vi soyamargarin sidan kurshaldaren har gode erfaringar med det.  Heime brukte vi meierismør.  Dette får vere opp til kvar einskild.  


RØRE
125 g soyamargarin, romtemperert    
2 dl sukker
2 egg
1 dl mjølk
3 dl kveitemjøl
1 ½ ts bakepulver
1 ts vaniljeessens

1.   Set omnen på 175 grader.
2.   Set 12 former i eit muffinsbrett.
3.   Rør sukker og margarin kvitt.
4.   Rør inn egga, eitt om gongen.
5.   Ha i mjøl/bakepulver og mjølk vekselvis.
6.   Tilset vaniljeessens.
7.   Fordel røra i muffinsformene.  Dei skal vere ca. 2/3 fulle.
8.   Steik kakene i midt i omnen i ca. 20 minutt.
9.   Avkjøl først kakene 5 minutt i forma før du legg dei på ei rist.

FROSTING
125 g soyamargarin, romtemperert
1 ts vaniljeessens
½ dl mjølk
6-7 dl melis
1 ts vaniljesukker
Konditorfarge

1.   Rør margarinen mjuk og smidig
2.   Ha i vaniljeessens. 
3.   Sikt i melis og vaniljesukker vekselvis med at du har i mjølka. Bland inn nok melis til at frostingen blir fast og smørbar.
4.   Tilsett konditorfarge.

PYNTING
Ha frostingen i ein sprøytepose.  Pynt etter eige ønske!


 Eg hadde liggande noko utstyr etter eit kakepyntkurs eg var på ein gong på 90-talet.  Men vi kjøpte like godt eit nytt sett til frøkna.  
 Desse formene og glaser med hjerter skal brukast til konfirmasjonen hennar.
Slikt formingsutstyr får ein i vanlege butikkar.  Det kom ikkje vaniljeessens som bestilt til skulekjøkenet førre veke, så vi brukte vaniljesukker

Over bekken etter vatn

I morgon er ein stor dag i slekta, noko som sikkert vil vise att på bloggar og facebook.  Frøkna skal stille i den nye bunaden sin, og til Sunnmørsbunaden skal det vere raud strømpebukse nettopp for frøkner.  Dette trudde eg skulle vere ei smal sak å få tak i etter at vi hadde kjøpt sko. På ein kjedebutikk fekk vi høyre at den var eigentleg svensk.  Akkurat som om det var noko unnskyldning når ein har etablert seg i alle byar og store bygder i heile Noreg. Cerise er visst fargen i Sverige.

På bunadsbutikken i bygda hadde dei berre raude strømpebukser i storleiken XL att. På dette tidspunktet var eg begynt å ergre meg over heile skikken med raud strømpebukse.  Kor tid vart det oppfunne?  Svart er vel den fargen som vart brukt frå gammalt av?  Verken til Sogne- eller Nordfjordbunaden bruker ein noko anna enn svart strømpebukse! Og kjor mykje vil det vise?  Kven vil bry seg?

Eg prøvde nabobutikken.  Kanskje dei hadde i største barnestorleik?  Nei, men der kunne dei fortelje at Karmen har hatt.

Så då for eg dit.  For folk som ikkje er lokalkjende får eg forklare at det er namnet på ein flott klesbutikk med same inngang som Prix. Eg går i alle fall forbi der annankvar dag ...

torsdag 29. mars 2012

Cupcake-kurs


Skulen vår er med i Sterk og klar-prosjektet. I dag arrangerte vi ein kveld der foreldre og barn melder seg på ulike kurs.  Ein prøver å finne kurshaldarar blant foreldra.  
 Då eg fekk høyre at eg skulle halde cupcakekurs, tenkte eg at eg burde hatt eit kurs sjølv!  Heldigvis fekk eg Astrid saman med meg.  Ho stod for all pynteopplæringa.
 Oppskrift og bilde ligg att på jobbmaskina mi, så det får bli ein annan dag.
I dag får de berre sjå frøkna sine produkt.  Ho valde å ta sjansen på å vere saman med mora sidan det no var ein mor/far-barn-kveld

Elles vil eg takke Astrid for eit strålande samarbeid!

Bevis at du ikkje er ein robot!


Eg har vore litt frimodig med slekt og bloggvener og spurt om dei kan ta vekk handikaplina.  Ein ser ikkje sjølv kva hinder ein lagar for andre.  Av og til slit ein med å kommentere.

Sjølv har eg ikkje vore utsett for robotmeldingar eller ekle kommentarar, så eg tillet også anonyme kommentarar.  Enkelte skriv ein initial eller eit formnamn under.  Så veit ein, eller kan gjette, kven det er.

Bloggarar må gjere som dei vil.  No håper er at eg ikkje har gitt nokon dårlege idéar av typen "Så sa dei at vi ikkje skulle putte erter i nasen. Det hadde vi ikkje tenkt på før."

Oppskrifte er enkel: vel nei for "Vil du vise ordbekreftelse ...?"

onsdag 28. mars 2012

Bok 17: Alle vil hjem. Ingen vil tilbake.

Tre gutar frå same bygda omkjem i Afghanistan.

Det er tre forteljarstemmer i boka.  Sigurd som hadde eit kjærleiksforhold til den eine soldaten.  Julie som miste bror sin, og Mats som er far til barnet hennar.
Vi følgjer personane og familiane deira i sorgprosessen.

Eg visste ikkje at dette var ei oppfølgjarbok.  Då ville eg ha lese «Bli hvis du kan. Reis hvis du må» før denne.

Eg liker innfallsvinkelen med tre stemmer. Historiene er truverdige og gripande. Dei handlar også mykje om det ikkje vert sagt.

Eit av verkemidla er at Sigurd, guten frå bygda ha fått si historie på nynorsk.  Mats er frå Oslo og historia hans vert skriven på bokmål.  Det er flott!  Men kvifor vert Julie frå bygda si stemme på bokmål?  Det hen ikkje i hop.

Boka vert lesen av tre stemmer.  Det gjer det lett å skilje personane.  Skal eg ha ei innvending mot lydboka, må det vere at Sigurd si stemme er gitt til ein skodespelar med bokmålsbakgrunn.  Uttalen hans av enkelte ord irriterer meg .  Som sveitar i staden for sve(i)ttar, eller fraamleis - om de forstår.

Sjølv om temaet er trist, er ikkje boka tung.  Les gjerne denne artikkelen der det står at den første romanen har fått Ungdommens kritikerpris.

Besta har bursdag!

Datamaskina har vore opptatt i heile dag.  Frøkna har skrive rapport frå arbeidsveka sidan eg kom heim i ettermiddag.  Noko anna som har vore opptatt, er telefonen til mor mi!  Eg har ringt med ujamne mellomrom.  No reknar eg med at ho har snakka nok i telefonen for i dag!

Vi gratulerer så mykje!  Bildet er frå den tida ho hadde sommarjobb på sjukehuset på Nordfjordeid.  Den eldre garde ser vel kven ho er fotografert saman med?  Bildet er scanna fra ei avis - og knabba frå facebook!

tirsdag 27. mars 2012

Grovbrød - eit undervisningsopplegg

No har vi kome til grovbrødbaking på skulekjøkenet.  Alle elevane på niande lagar si eiga brødoppskrift og dekorerer/reklamerer/gir produktinformasjon på sin eigen brødpose. Det eg viser på bloggen, er berre ein kortversjon av opplegget. Måla og kriterier for dei ulike karakterane vert presenterte for elevane.
Elevane får sjå ulike kjøpte posar i tillegg til ein eg har laga sjølv; Solveigs solsikkebrød.  Brødet skal vere mellom 50-75% grovt. For å gjere det lettare for elevane, har eg laga ein mal der dei kan fylle inn mjølsortane.  Eg viser dei ulike mjøl- og frøsortar og forklarer eigenskapane deira.

MI BRØDOPPSKRIFT:

25 g gjær
3 dl vatn
2 ms ………………olje
¾ ts salt

……………… g kveitemjøl (125-250g)

……………… g sammalen kveite, grov

……………… g sammalen kveite, fin

……………… g sammalen rug, grov

……………… g sammalen rug, fin

……………… g havregryn, store eller små

………………. g linfrø/solsikkefrø/graskarfrø

Til saman grove mjølsortar og frø: 250-375g
(Til saman fint +grovt mjøl= 500 g)
Prøvebaking: Brødet til venstre er 75% grovt, og brødet til høgre er 50 % grovt.


Eg håper at elevane anten bakar eller kjøper skikkeleg grovt brød!


For ordens skuld: Eg har innhenta løyve både frå eleven og mora til å legge ut illustrasjonsfotoa!

søndag 25. mars 2012

Vaflar

Det er dagar for det meste.  I dag er det visst den store vaffeldagen.  Kanskje det vert årets første vaffelsteiking på altanen.  Vaflar er visst den meste vanlege kakesorten i Noreg.  Ein del vaffeloppskrifter er reine kakeoppskrifter med store mengder smør og sukker.  Det er ikkje nødvendig for å få gode vaflar! Under kjem ei grunnoppskrift.
5 egg
4 ms sukker
1 liter surmjølk
1 ts natron
7 1/2 dl kveitemjøl
1/2 dl smelta/flytande margarin/smør

Rør saman alle ingrediensane unntatt halvparten av mjølka.  Når røra er klumpefri, har du i resten av mjøla.  Røra må svelle minst 20 minutt før du steiker vaflane.

I vaffelrøre er det vanleg å kvitte seg med ulike restar av fløyte og rømme.  Vaflar vert mykje betre med surmjølk enn med søtmjølk, men har ein berre søtmjølk, kan ein ha i litt rømme.  Sjølv har eg i nokre ekstra egg og erstattar minst 1/3 av mjølet med sammalen kveite , fin.  Det finst også eit  grovt mjøl som er male endå finare som ein kan bruke.


Kva skal ein servere til vaflar, finst det vel mange ulike meiningar om.  Eg føretrekk lettsukra jordbær og/eller bringebær og lettrømme.

fredag 23. mars 2012

Gratulerer Ingeborg!

I dag kan vi gratulere Ingeborg med 19-årsdagen!  Vi håper og trur at ho har ein fin dag i London!  Eg har ikkje tatt meg tid til å leite etter gamle bilde, så ho slepp unna med eit eg fann på facebook!

Det følgjer vel ingen rettigheiter med det å bli 19, men det er vel i den alderen at mange tek eit viktig vegval.  Det skal bli spennande å sjå kva Ingeborg slår inn på!

ORD,Ord,ord

Det brakar laus med norsktentamenar i tiande neste veke.  Temaet er ORD, Ord, ord.  Kvifor bruke engelsk når det finst så mange gode adekvate synonym?   Her finn ei liste med forslag til avløysarord.

Som blogglesarane veit, meiner eg at ein snarast bør innføre aksessoarar som normal skrivemåte, slik at uttalen vert rett.  Den siste eg høyrde seie assesoarer var ein programleiar på Frukost-TV. Ein skulle tru der var så mange som arbeider rundt eit program - ein bør vel ikkje bruke ordet team her - at nokon greip inn.

torsdag 22. mars 2012

Risotto

 Middagen i dag begynte eg å lage på 80-talet då eg underviste på barnetrinnet.  Oppskrifta fann eg i Liv og røre, om nokon hugsar den.
No tek eg oppskrifta frå hovudet.
 Det er vel mange middagar som startar med at ein steiker kjøtdeig og løk.
Denne dunken med fem kilo ris kjøpte eg på Sunnmøre folkebutikk for 95 kroner.  Det får vere dagens reklame.
I dag hadde eg i ein boks bønner i chilisaus. Ein kunne kanskje kalle den mexikansk gryte like godt som ferdigmatindustrien gjer det?  Det er lurt å bruke pengar på gode ingrediensar i staden for posar med pulver. Her er det berre å krydre og tilsette ingrediensar etter eige ønske!

onsdag 21. mars 2012

Arbeidsveke

Niandeklassingane har arbeidsveke, eller praktisk yrkesorientering, denne veka.  Frøkna har fått seg jobb i lokalavisa.  Aller helst ville ho nok arbeidd som veterinærassistent.  Men det er ho for ung til.

Yrke går ikkje i arv no som før i tida då ein arva eit gardsbruk eller fekk opplæring i eit praktisk yrke.  Likevel dett vel mange ikkje så langt frå stammen.  Eg bruker å spørje elevane eg har i mat og helse kva yrke dei trur mi mor og mormor hadde.  Lærar pluss kokk - er det lik mat og helselærar.  Kva eg har arva frå farmor som dreiv eit lite småbruk?  Utsjånaden vil kanskje slekta seie.  Særleg dyreinteressert har eg ikkje vore.  Katt vil eg gjerne ha, men det er nok.  Eg vert skulda for å ha eit praktisk syn på det meste.  Kanskje det er der det ligg.

I slekta vår er det mange lærarar, så eg oppmodar borna om å prøve noko anna.  Før sa ein at ein kunne ta lærarskulen, og så kunne ein alltids bli noko anna.  No kan ein studere og alltids bli lærar med eitt års pedagogikkstudium.

Elevane no er heldige.  Dei får drive med jobbskygging i tillegg til hospitering rundt om på skulane.  Mulegheitene er fleire enn dei var for oss, noko som ikkje gjer valet enklare.

tirsdag 20. mars 2012

Kan ein brette opp armane?

Solveig, heiter det eigentleg arm eller erm?


Nokre spørsmål vert ein norsklærar meir glad for enn andre.  I daglegtalen bruker mange berre arm. Eg prøver å oppmode folk om å bruke ordlista.


erm
erm -a [-i], -ar [-er] (norr ermr; av I arm) stykke av kledeplagg som dekkjer armane skjortee- / kjole med korte, lange e-ar 



arm
I arm m1 (norr armr)
1 framlem hos menneske og aper; hand (1) ha vondt i a-ane / gå a- i a- / halde noko på strak a- / ta imot (noko(n)) med opne a-ar særl overf: med største glede / kaste seg i a-ane på nokon særl overf: gje seg heilt over til
2 zool: gripe- el. rørslelem på ryggbeinslause dyr a-ane på blekkspruten
3 del av reiskap, ting e l som minner om ein arm (I,1) el. greinar seg ut frå noko a-ane på ei trillebår / ein a- av ein fjord / ein lysestake med sju a-ar


Eg forklarte fort at erm er ein del av eit klesplagg medan arm er ein kroppsdel.  Den same jenta trekte på smilebandet då eg sa at ein kan ikkje lett brette opp armane.  Sjå det for deg, så skriv - og seier du - alltid å brette opp ermane.

mandag 19. mars 2012

Bok 16: Dødelige dråper

Denne boka fann eg på biblioteket førre måndag, og eg må innrømme at eg ikkje hadde så store forventningar til thrilleren.

Eg-personen i boka, Mia, er ein journalist med ein utru ektemann.  Eg såg straks parallellen til Liza Marklund sine romanar.  Mannen heiter attpåtil Thomas.  Språket verkar platt med klisjéar som rygge bakover og   øredøvende stillhet.  Men så reiser Mia til Brasil på frilansoppdrag.  Her møter vi paret Frank og Heidi.  Han har sett alt han eig i pant for å tene seg rik på olje.

Vi vert dregne inn i ei spennande historie i eit land der ting fungerer på ein annan måte enn her i landet.  Forfattaren skildrar personar og miljø med brodd og ironi.

Det forundrar meg ikkje at forfattaren har budd i Rio de Janeiro og jobba som PR-rådgjevar i eit oljeselskap. Det er viktige tema ho tek opp.

Nye bøker

Det har begynt å bli ein vane å køyre frøkna på korpsøving på måndagane før eg stikk innom biblioteket.  I dag var der nye lydbøker. Eg har begynt å venje meg til i-poden. No er neste utfordring å få lasta ned i-tunes på den nye datamaskina. Blogglesarane må gjerne anbefale ei eller fleire av bøkene ovanfor!

Med den gamle datamaskina forsvann lydbokbiblioteket mitt.  Det var like greitt.  Så vert det meir orden.  Men det er også greitt å lage seg eit lite nytt eit.
Hekleboka lånte eg for å finne oppskrifter på hekla blomster til nokre elevar som ville pynte tøflane sine med det.

søndag 18. mars 2012

Blått er flott!

 I dag var det frøkna som bestemte fargane på bordet.  Gryteunderlaget har eg strikka for å sjekke kvaliteten på rimeleg garn.  Iglogarnet som før var godt å strikke tøflar av, har endra seg.  Garnet på Nille er av same kvalitet.  Så vi har kome fram til at vi må satse på Raumagarn til tøflar.  Når det gjeld garn, heng pris og kvalitet godt saman.  Eg er samd med mor mi i at det ikkje er vits å bruke tid på å strikke med dårleg garn. Til gryteunderlag kan ein vel gjere unnatak.
 På menyen i dag stod det svinekotelettar med tradisjonelt tilbehør.  Frøkna har laga fruktsalat med yoghurtkrem til dessert.
Vårkjensla varte ikkje lenge.  I dag har det snøa her.  Heldigvis smeltar snøen etter kvart.

lørdag 17. mars 2012

Primula Botanic veris Victoriana II

I mettermiddag har eg vore ute i hagen ei lita økt.  Sjå kva som har tenkt å blomstre!  I fjor i april kjøpte eg tre slike plantar.  Eg planta dei ut i eit bed i håp om at dei skulle kome att.  Og det har to av dei gjort! No har eg lagt litt ekstra jord rundt dei.

fredag 16. mars 2012

Prisfest?

Ærendet i byen i dag var eit par sko til yngstemann.  På Amfi var det prisfestdagar med store plakatar, ballongar og barnepass til barn i rette alderen.  Dei kunne sitte rundt eit langbord og "forme" slik at foreldra, helst mor det eg kunne sjå, fekk handle i fred og ro.

På ein butikk var det posesal der ein kunne fylle eit nett med klede for 300 kroner.  Det var helst jenteklede såg vi, og var glade for at vi sette frøkna att heime.

No lurer vel kanskje blogglesarane på kvifor der er bilde av to skoøskjer når vi berre skulle ha eitt par sko?  Jau, trur de ikkje ein fekk halv pris på skopar nummer to?  Det eg lurer på, er om eg har fått 50% rabatt, eller eigentleg ca. 20 %, sidan rabatten var på det billegaste paret? 

Eg må vel berre innrømme at det ikkje var guten, men mora som ivra mest for det andre paret ...

torsdag 15. mars 2012

Pizzasnurrar

 Inspirasjonen til å bake pizzasnurrar fekk eg på Sunnmøre Folkebutikk.  Dei hadde store glas (675 g) med soltørka tomatar for 25 kroner.
 Dessutan fann eg freistande chili i litt forskjellige fargar.  Ein kunne verte freista å pynte med dei! Eg trut nok dei er litt sterkare enn den vanlege varianten, så her må det finhakking til!
 Deig:
1/2 pk gjær
3 dl lunka vatn
1 -2 ms olje (eg tok frå glaset)
1/2 ts salt
1 1/2 dl sammalen kveite, grov
ca. 6 dl sammalen kveite

Lag vanleg gjærdeig.  Hev til dobbel storleik.

Fyll:
1 dl cottage cheese
2 ms olje (eg tok frå glaset)
1 raud chili utan frø
15 marinerte soltørka tomatar, grovhakka
2 ts tørka basilikum eller 15 friske blad, hakka
2 båtar kvitløk
2 dl riven ost
(1 dl pinjekjernar eller solsikkefrø)

Bland saman fyllet.
Fordel det over deigen som du har kjevla ut.
Rull saman og del i 16 bitar.
Etterhev.
Steik ved 220 grader midt i omnen i ca. 20 min.

onsdag 14. mars 2012

Guava

 Då vi besøkte studenten i Oslo første gongen, budde han på Grønland.  Eg gløymer ikkje innvandrarbutikken der!  Grønsakdisken utanfor var full av spennande frukter og grønsaker.

Utvalet på Hareid (Sunnmøre Folkebutikk)er ikkje så stort enno.  Men eg fann ei frukt eg ikkje har smakt før. Eigaren sa den smakte litt som pære.  Kiloprisen var relativt høg, 60 kilo trur eg.  Ei frukt kosta i alle fall 17 kroner. Frøkna og eg delte den, og var samde om at pæresamanlikninga ikkje var så dum.



tirsdag 13. mars 2012

Samansette tekstar

Det er rein luksus for ein lærar å få setje seg på skulebenken ein heil dag og overlate elevane sine til andre.  Varm lunsj fekk vi og.

Temaet i dag var samansette tekstar.  Vi fekk lære ord og uttrykk for analyse av slike tekstar, alt frå trykt reklame til små filsnuttar.  Filmsnutten under bør ein kjenne klassa si før ein eventuelt viser dei den.  Det er ikkje lenge sidan vi fekk den presentert av Fosterheimskampanjen.  Når ein analyserer den, ser ein stadig nye element.  Legg t.d. merke til armbandet.


I Noreg er det eit stort behov for fosterheimar ...

Det skjer mykje innan norskfaget og pedagogikken for tida.  Til hausten kjem ein revidert norskplan.  Det skal verte spennande.  I dag har eg i alle fall lært noko nytt eg kan ta med meg inn i undervisninga!

mandag 12. mars 2012

Bok 15: Brente skygger

Då eg hadde lese denne boka, tenkte eg: Dette må vere ein såkalla bestseljar.  På Bokkilden står der "Internasjonal boksuksess".  


Det opnar godt med forteljinga frå Nagasaki 1945. Hiroko har forlova seg med ein tysk mann.  Så fell bomba, og ho vert merka for livet.  Av han er det berre feittskuggen att.


Ho reiser til Pakistan.  Og her begynner oppskrifta på ein bestseljar: To familiehistorier vert knytt saman over tid og over kontinent.  Forfattaren vil så mykje, så har vert det mykje handling og lite djupn, meiner eg.  Personane er skildra utan at ein kjem under huda på dei.  

Språket er heller ikkje tøft nok til handlingane etter mitt syn.  Eg synest det har vore skrive betre bøker frå til dømes Afganistan før.

Andre trekkjer fram superlativa når dei omtalar denne boka.  Blogglesarane må gjerne gjere seg opp si eiga meining.  Kjedeleg er romanen ikkje.




søndag 11. mars 2012

Fiskegrateng

Dagens middag er inspirert frå eit matprogram eg såg i sommar der ein TV-kokk laga fiskegrateng med grønsaker i staden for makaroni.  Blogglesarane får berre inspirasjon i dag, ikkje oppskrift.

Tradisjonelt lagar ein fiskegrateng med litt fisk og heller rikeleg med makaroni.  Har ein rikeleg med fisk, er det ingen grunn til å spare.  Fisk er sunt og godt.  Ein kan bruke restar av kokt fisk eller la rå fisk koke med i den kvite sausen.  Eg kvitta meg med ein halv pakke grøne erter i dag.  Elles brukte eg seks eggeplommer i sausen og bretta inn seks stivpiska eggekvitar til slutt.  På toppen brukte eg riven ost.

Skulle eg ha gjort noko annleis, ville eg hatt litt riven ost i sausen og.  Det gir god smak.  Gratengen begynner å nærme seg sufflé ... Det hadde sikkert smakt godt med blomkål i gratengen.

Eg brukte den raude gryta mi til form, og såg fort at det vart rikeleg med mat.  Derfor kutta eg ut potetene og serverte berre rivne gulrøter til.

Ein ting eg har merka meg på Hareid er at kvar gong det er snakk om fiskegrateng, er det nokon som hardnakka hevdar at det heiter kreteng. Skal tru kven som har lært dei det?

lørdag 10. mars 2012

Nytt strikketøy

 I går bestemte eg meg for å sjå etter eit nytt strikketøy, gjerne i garnet "Hverdags".  Dette garnet er høveleg tynt til kle ein kan gå inne med på jobb.  Jakker er spesielt greitt å slenge av seg på skulekjøkenet der eg har liggande ei høveleg jakke som toler mykje vask.
Dette mønsteret er i eit anna garn med same strikkefastheit.  Fargane ser litt annleis ut enn namnet på dei tilseier.  Eg valde fargar i "Hverdags" som liknar fargan slik dei ser ut på bildet, om de forstår kva eg meiner.  På den måten vart det tre av fargane på førre prosjekt, noko som sjølvsagt er økonomisk og praktisk med omsyn til restar.

fredag 9. mars 2012

Trondheimssuppe

Det vart att nokre restar av "grov" ris, som eg hadde kjøpt på Sunnmøre Folkebutikk, etter middagen ein dag.  Eg hadde funne ei flaske ripssaft i frysaren.  kanskje det var ein tur innom gamlebloggen min som gjorde at eg fekk så lyst på denne merkelege suppa?

I l vatn
1/2 dl ris grautris (eller anna/restar)
1/2 pk svisker

1 dl mjølk
2 ts kveitemjøl
3/4 dl ripssaft
1-2 ms sukker
2/3 dl fløyte eller rømme

1. Kok vatn og ris i 20-30 minutt.  Sviskene skal koke med 15 minutt av desse.
2. Lag jamning av mjøl og mjølk.
3. Ha i resten av ingrediensane unntatt rømmen, og la suppa koke nokre minutt til.
4. Ha i fløyte/rømme ved servering.

Eg ser at enkelte brukar rosiner i suppa.  På Mega hadde dei nokre store som sikkert hadde eigna seg.

Dette er nok ei suppe som høver for oss på 40+.  Eg lurer på om det ikkje hadde vore godt å kokt med litt heil anis eller kanel?

torsdag 8. mars 2012

Retro

 Eg har ikkje lagt meg opp noko nytt strikketøy enno.  Før eg kjem så langt, så kan eg no studere oppskrifter i dei nye bøkene mine.
 Denne jakka i retrostil var det noko kjent med.
Mor mi strikka denne til meg då eg gjekk siste året på ungdomsskulen.  Bildet er frå juni 1979.

Om eg kjem til å strikke meg ei ny slik jakke, veit eg ikkje.  Eigentleg har eg lyst til å finne ei oppskrift på ei jakke i ganske tynt garn.

onsdag 7. mars 2012

Rundstykke med brødkrydder

Eg er inne i ein periode då eg prøver å redusere matlagra mine, spesielt frysarane.  Eg treng plass til kaker og anna i høve konfirmasjonen i mai. Det meste av middagsmaten kjem derifrå, og vi lever ikkje dårleg.  Det begynner faktisk å gje resultat.  Men så har eg også fått plass til litt gjærbakst.  Heldigvis går det fort å tøme frysaren for brød og rundstykke.
Inspirert av Knallgode brød laga eg smakfulle rundstykke i helga.

Om skålding
Skålding vil seie at ein heller kokande vatn over mjølet.  Mjølet vil suge til seg meir væske, og det vert utvikla smaks- og aromastoff.  Brød som er bakt med skålding, vil smule mindre og verte saftigare.

1/2 kg kveitemjøl
75 g smør
1 ms brødkrydder/ knust anis og fennikel
1 liter kokande vatn

1 pk gjær
2 egg
2 ts salt
2 ms sirup/maltekstrakt/brunt sukker (kan sløyfast)
kveitemjøl til passeleg deig

1. Skåld mjølet og krydderet og la dette stå i bolle med lok over til det har nådd romtemperatur, ca 3 timar.
    (Er du utolmodig, kan du bruke romtemperert væske og knuse krydderet finare.)
2. Smuldre deigen over det andre.  Ha i egg, salt, ev søtstoff og 15 dl kveitemjøl til å begynne med.
3. Lat maskina arbeide deigen til han slepper bollen og ser fin ut.  Deigen bør vere lausare enn til brød.
4. Hev opp til kanten av bollen viss du bruker ei Kenwoodmaskin som eg gjer.
5. Trill ut 32 rundstykke fordelt på to plater.
6. Hev rundstykka ca 1/2 time.
7. Steik rundstykka midt i omnen ved 225 grader ca 15 minutt.  Her må ein kjenne omnen sin.
Eg fekk redusert brødkrydderlageret mitt til ein boks ...

tirsdag 6. mars 2012

Bok 14: Jeg skal gjøre deg så lykkelig

I denne romanen teiknar forfattaren eit godt tidsbilde. Ho skildrar miljøet i eit burettslag der dei fleste kvinner er heimeverande.  Ei har fryseboks.  Ei kjem frå England og lagar rettar av rimeleg norsk innmat. Ei har ein mann som er selgar for Toro.  Suppeposar er nytt i denne tida.  Der kjem ein støvsugarseljar  som går på dørene og ein som sel kikhol til dørene.

Nils Ole Oftebro les denne boka godt.  Om det er stor litteratur, kan vel diskuterast, men underhaldningsfaktoren er stor. Romanen er lettlesen.

Medan eg las, tenkte eg at Anne B. Ragde og Amalie Skram (Avkom) begge diskuterer ekteskapet i kvar si tid. I 1965 har kjærleiksekteskapet vunne fram, men er folk lukkelege? Kvinnene er enno ikkje sjølvstendige.  Ein mann kunne tenke seg å arbeide frå heimen i tillegg til å gjere husarbeidet, men vil kona det, ho som kunne hatt si eiga karriere?

Eg trur dette er ein roman som dei som har opplevd 60-talet vil like.

mandag 5. mars 2012

Kvardagsvest

Denne vesten strikka eg i eit garn som heiter Hverdags.  Eg fann ei oppskrift på ein genser på Drops design og rekna om strikkefastheita ved å gonge med 27 og dele på 24. Vesten er felt jamnt inn i livet og lagt ut att i sidene.  Til brotet på ermane la eg opp og felte inn som på bolen. Det vart mykje matematikk! Med så tynt garn og pinnar nr 2,5 og 3 vert dette eit godt plagg å ha på seg på jobb.
Related Posts Plugin for WordPress, Blogger...