Søndagsmiddag

 I dag inviterte eg journalisten på middag før han for til bya for å dekke kamp.

 Eg starta med å koke pærer etter oppskrifta til Gunda i Sylting og safting heile året s. 97.  Sukkermengda er den same som vi bruker til plommer.  Men her er også nokre spennande krydder i.  Å hermetisere dei i glas, gadd eg ikkje.  Ein så pass liten porsjon står seg nok i kjøleskåp til vi har ete han opp.  Men eg synest å hugse at vi fraus ned slike pærer før i tida?  Det vert annleis om ein har pæretre og vil redde avlinga.  Mine pærer kjem frå butikken.

Sjølv synest eg det er best med krem til pærer, men borna vil gjerne ha vaniljeis til.  Dei fekk bestemme i dag.

 Oppskrifta til kyllinggryta fekk eg nedskrive av ein kollega.  Eg følgde den sånn omtrent.  Det er ein rett med nokre glas med ferdigmat i.  Ein annan gong trur eg nok at eg skal greie meg utan det i midten.

 Eg fresa først 1 1/2 ms karri i litt olje.  Så let eg 1 paprika, 1 purreløk (som eg erstatta med løk frå hagen) og to eple i bitar (Granny Smith).  Etterpå hadde eg i 1 glas indisk karrisaus, 1 1/2 ts karripasta, 1 ms mango chutney, 3 dl matfløyte (Det kjøper eg aldri, men blanda H-mjølk og kremfløyte) og 1 ts salt.

Dette fekk stå og småputre medan eg steikte 6 kyllinfiletar i strimlar og hadde i.

 No skulle dette inn i omnen.  Eg let det berre stå på plata til kyllingen var gjennomkokt.  Kyllinggryta falli smak hos familien.  Eg serverte ris og salat til.

I går var eg innom Nille.  Der hadde sommarserviettar og pastellfarga lys kome på halv pris.  Eg vart i grunnen ferdig med prikkar tidleg på åttitalet, men synest det er greitt å følgje moten  på ein pakke serviettar.

Nokre av riddarsporane og peonane mine hadde lagt seg ned på grunn av manglande støtteapparat.  Eg plukka inn nokre tidlegare i veka.  Derfor høvde det godt med liknande fargar på lys og serviettar.