Bok 21: En annen tid, et annet liv

Frå coveret:
En annen tid, et annet liv ble kåret til årets beste kriminalroman av Svenska Deckarakademin!" Leif GW Perssons bøker er både geniale og unike." Håkan Nesser. Det er kaos i Stockholm sentrum. En lovlig demonstrasjon har kommet ut av kontroll, og stein og tåregass fyller luften. Kort sagt, politiet har hendene fulle. Kl 20.05 kommer et anrop på politiets alarmsentral: " ... dere må komme med en gang ... noen er i ferd med å drepe naboen min!" To ganger til ringer det før politiet går til aksjon. Da uttrykningsbilen når frem til adressen i Östermalm, er det for sent. Kjell Göran Eriksson ligger død i en blodpøl. Hvem var denne Eriksson? Offentlig ansatt, alltid korrekt, reservert, stille, anonym, sier naboen. Han var et ondt menneske, en drittsekk tvers igjennom, hevder en kollega. Hva er sannheten? Hva er nøkkelen til gåten Eriksson? Den er kanskje gjemt i en annen tid, et annet liv...

Frå Wikipedia:

Romaner 

• Grisfesten (1978)
• Profitörerna (1979)
• Samhällsbärarna (1982
• Mellan sommarens längtan och vinterns köld (2002)
• En annan tid, ett annat liv (2003)
• Linda – som i Lindamordet (2005)
• Faller fritt som i en dröm (2007)
• Den som dödar draken (2008)
• Den döende detektiven (2010)
• Gustavs grabb (2011)

De tre bøkene Mellan sommarens längtan och vinterns köld, En annan tid, ett annat liv og Faller fritt som i en dröm inngår i en trilogi om mordet på en svensk statsminister.

Eg slit framleis med å bli heilt klok på denne forfattaren.  Romanen er prisløna. Som i første romanen sleit eg litt med å halde alle namna frå kvarandre.  Etter kvart går det greitt.  Krimromanen passar kanskje  best for dei som er politisk interesserte?  Samtidig må ein lese litt mellom linjene.

Oppklaringa er noko spesiell, og den stiller spørsmål om skuld og straff. Eg oppfattar den også som eit skikkeleg sleivspark til svensk politi - og til enkelte typar politifolk.

Språket er godt og spesielt.  Vi får vite kva ein person seier først, etterpå kva personen tenkjer. Eg kjem nok til å lese den siste i trilogien også, men kanskje ikkje med ein gong.

Stevia

Eg har vore litt nysgjerrig på dette søtstoffet stevia, men gjerrig nok til ikkje å kjøpe det.  Men når Lerum går ut med at dei skal lage saft og sylte utan kunstige søtstoff, då må eg prøve.

I sommar kjøpte eg "Safting og sylting heile året" og laga mange av syltetøya der i tillegg til eigne variantar..  Eg har faktisk hatt heimelaga sylte til no.  Heilt tomt er det heller ikkje.  Men det hender no det dett eit eller to sylteglas ned i handlekorga.  Favoritten er kanskje Nora sitt "Narurlig lett".

Kan Lerum konkurrere? Først les eg på glasa.  Begge inneheld omtrent 45 % bær.  I Lerum sitt er det vanleg sukker (22%) i tillegg til Stevia.  Lista av tilsetningsstoff er lang på begge glasa. Nora sitt har friskast farge.  Konsistensen er omtrent den same.  Dei to glasa kostar omtrent det same, 28 kroner, men storleiken er ulik som de ser.  Etter mi meining smakar Nora sitt syltetøy friskast og best.

Neste gong eg lagar vaflar, skal eg ta opp ein pakke jordbær frå frysaren , drysse litt sukker eller melis på og ete halvtina. Det kan konkurrere både i pris (17,50 for 500 g i dag), og ikkje minst smak.  Og med at med eit bærinnhald på 80-90 % vil dette og bli eit langt sunnare syltetøy.

Helgetorsdag

 Det er ikkje berre dei tobeinte som set pris på det milde veret.

Kaninane har lengta ut.

 Og så er det nokre med endå fleire føter som dukkar opp.  Sjølv har eg ikkje edderkoppangst.  Denne kverka eg og skylde i do.

 I dag vert det spelt fotball heile dagen.  Eg har halde meg heime.  Middagen vart heller enkel.  I tillegg til pizza laga eg ei brokkolisuppe med frisk timian til.  Urtekryddera eg kjøpte på Mester Grønn verkar meir robuste enn dei ein kjøper på matbutikkane.  Dei første er vel meinte å skulle vare heile sesongen.

Dette arbeidet har legt litt på vent.  Eg tok litt hardt i med hagearbeid laurdag. Høgrearmen likte ikkje at eg bar bøtter med kompostmold.  Så eg har lagt all strikking til side. Men i dag har eg sydde eg dei første stinga for å få på plass eine stolpen.  Når ein først veit kvar ein skal stikke, går det greitt.  Eg må strikke og sy på denne før eg planlegg knappehola på den andre.  Til slutt kan eg strikke halskragen.  Det hadde vore kjekt å vorte ferdig til over helga.

8. mai

 I dag har vi hatt ein varm og fin dag her.  Og no grønkar liene og hagane!

Det er ikkje berre ute det har kome seint i gang.  Eg sådde nokre skvåsjfrø som spira heller seint, synest eg. Men det plar bli nok svåsj når den tid kjem.

 Det er noko med desse vekstane der ein ser skilnad frå dag til dag.  Rabarbraen må skunde seg no!

Elles har eg vore så heldig å få vere med 8B på bedriftsbesøk i dag.  Dei fleste bedriftene i bygda tek imot skuleklasser.  Det er interessant og svært viktig for motivasjon for utdanning. For dei er det viktig å rekruttere, vil eg tru.  Sjølv kan eg ikkje hugse å ha vore inne på Grepa i Ørsta til dømes.  Der far min jobba, fekk eg sjå meg rundt, så eg har vore inne på konfeksjons- og møbelfabrikkar.  Og vi var inne i eit kraftverk.

Ungdomar som skal velje yrke, må vite mest muleg om kva valmulegheiter dei har - og det er ikkje få!  I dag vart det og sagt at det dei skal jobbe med, er kanskje ikkje oppfunne.

Opptur

 Turarrangørane hadde diskutert ulike alternativ heilt fram til i dag tidleg.  Dei gjekk for plan B.  På grunn av snø på den oppsette ruta nedover mot Overå, gjekk vi opp og ned same ruta.

 Kven skulle trudd vi fekk så fint ver?  I går kvel hølja det, men meldingane var fine.

 Det vart ein fin dag for lærarar og elevar.  Det vart topptur på alle.  Meistring gjer meister er det nye slagordet i skulen.  Om det er litt tungt undervegs, så er det berre så herleg å kome på toppen.

Her ser vi heimover.  Og så var der akkurat nok snø til ein liten snøballkrig.

Ein topp dag på jobb!

Bytur

Ærendet i byen i dag var som vanleg å levere inn bøker på biblioteket.  Frøkna mangla også passar til ein komande tentamen.  Det vart til at eg kjøpte to ulike.  Det skal ikkje stå på utstyret.

På Mester Grønn hadde dei amplar til 100 kr.  Det vart freistande å ta med eit par heim.  I fjor hadde eg sterke fargar i pottene.  I år vurderer eg litt bleikare fargar.  Det er greitt å variere.  Eitt år gjekk alt i kvitt, blått og oransje.  Blomster er fint uansett, men det bør kanskje vere ein ide bak fargeval?

5. mai

 På facebook kan det sjå ut som folk har begynt å gå i fjellet.  Eg gjekk den tradisjonelle turen rundt vatnet.  No har dei rydda vekk ein del buskar og greiner.  Det gjer at vi ser elva. Men særleg grønt er det ikkje enno.

 Eit vårteikn som har kome på estlandet er desse hestehovane som vi las om før i tida.  Først i seinare år har eg opplevd å sjå dei.

 Det er berre to dagar til vi skal på Opptur.  Vi håper det blir ein topptur og ein topp tur.

Frøkna var i konfirmasjon i dag. Journalisten hadde vakt, men kom innom til middag.

Pavlova - steg for steg

Eg har fått høyre at "alle" lagar Pavlova på Hareid for tida.  Så spørs det om det er niandeklassingane som har spreidd bakeglede, eller om oppskrifta til farsdag i Vikebladet fekk folk i sving? No er det igjen tid for kaker.   Marengsbotnen kan stå seg i fleire veker, men kaka må pyntast same dag som du skal servere henne. Med ferdiglaga vaniljekrem går det på eit blunk.  Vil du lage heimelaga vaniljekrem, finn du link til det.  Niandeklassingane brukte handmiksar, så om du ikkje har stor kjøkenmaskin, så kan du likevel lage marengsbotn.

Dessertkaka er populær og enkel å lage.  Du kan forme marengsbotnen i den fasongen du vil.  Til pynt vel du søt frukt og bær etter ønske.  Pyntinga kan gjerast i fint mønster som til venstre eller hulter til bulter som til høgre.  Smaken vert den same.

Marengsbotn (ca 28 cm):

3 eggekvitar
1 ½ dl sukker

½ ts potetmjøl (kan sløyfast)
1 ts vaniljesukker

  Set steikeomnen på 140 grader.

 Pisk eggekvitane stive før du set til sukkeret og piskar vidare til marengsmassen er stiv.

(Eggeplommene kan du oppbevare i eit lite glas i kjøleskåpet nokre dagar, til dømes til neste gong du lagar vaflar eller pannekaker. Eg kan og anbefale heimelaga vedunderleg vaniljekrem.)

 Bruk slikkepott og rør inn potetmjøl og vaniljesukker.

 Form kaka på ei bakepapirkledd omnsplate.  Eg forma botnen min på frihand, men du kan gjerne teikne form på bakepapiret.

Steik marengsenbotnen til han vert sprø, ca. 1 time.  Avkjøl.

Pynt og fyll:
1 pk vaniljekrem

1 pk kremfløyte   
frukt og bær                                                                                                                                                   

Dekk marengsbotnen med eit lag vaniljekrem.

Pisk kremfløyten stiv, og dekk kaka med kremen.

 Pynt kaka.

Frukt i mønster ...

eller hulter til bulter.  Smaken er den same.

Bok 20: Døden to ganger

I dag har eg lese siste halvdelen av denne krimromanen medan eg har vaska og jobba i hagen.  Så fekk eg sagt det.

Døden to ganger er den femte i rekka med etterforskar Archie Sheridan og seriemordaren Gretchen Lowell. Bøkene bygger på kvarandre, så her meiner eg ein må starte med den første.

Gretchen er innesperra på eit psykiatrisk sjukehus.  Likevel har ho kjennskap til mord som skjer. Koeleis kan dette henge saman.

Romanen er spennande frå byrjing til slutt.  Det er ingen krim for pyser. Ein må tole å lese ganske detaljert om tortur og vald.  Dette vert nok ikkje siste romanen i serien.

Ondskapens hjerte (Heartsick, 2007)

Hjerterdame (Sweetheart, 2008)

Hjerterått (Evil At Heart, 2009)

Mørketid (The Night Season, 2011)

Døden to ganger (Kill You Twice, 2012)

Helg igjen

 Det eg liker best med Mai er at det er så mange helger!  Vi kan sjå fram mot helg, ei kort veke og ei lang helg igjen!

Veret er det verre med for tida.  I dag var det rett og slett ikkje muleg å sjå Melshorrnet, og det snøa.  Heldigvis smeltar snøen etter kvart.  Over helga er det meldt varmt ver og sol.  Så vi kan gle oss til oppturen!

 Elles har eg sikra meg eir lesestoff.  Slike MP3-plater høver best når ein kan lese lenge om gongen.  Laurdagane er vel den beste lydboklesedagen for meg med rikeleg med praktisk arbeid.

No er det tid for kveldsmat.  I det siste har eg eksperimentert mykje med surdeig.  Eg laga ein lys rett og slett med å starte med litt av den vanlege som er laga på finmalen sammalen rug.  Eg matar surdeigen kveld og morgon, og så bakar eg når eg kjem heim frå jobb.  Brøda vert ikkje sure når ein matar surdeigen ofte, har eg funne ut. No kviler begge surdeigane i kjøleskåpet.  Eg tek dei fram når det høver.

Då står det att å ønskje blogglesarane ei god helg!

Bok 19:Der hvor roser aldri dør

Det skjer eit ran i ein gullsmedbutikk der ein tilfeldig forbipasserande vert skoten i etterkant. For snart 25 år sidan forsvinn Mette.  No vil mor hennar gjere eit siste forsøk på å finne ut kva som skjedde før det vert for seint til å straffe den skuldige.

Romanen følgjer den vanlege oppskrifta på krim.  Hendingar i fortid og framtid heng saman.  Varg Veum løyser ei sak for politiet samtidig som han løyser den gamle gåta.

Eg liker den konsentrerte hendinga og komplottet.  Etter mi meining er Gunnar Staalesen ein meister i person- og miljøskildringar.  Til og med kaffien han får servert rundt om kring, får sitt pass påskrive.  Eg kosar meg med språket.

Viss det finst blogglesarar som er skeptiske til lydbøker, begynn med Staalesen.  Lass Lindtner hevar bøkene eit nivå.  Han meistrar ulike dialektar anten det er Bergensdialekt eller Nordlandsdialekt.  Også den typiske rusa sin måte å snakke på tolkar han framifrå.

1. mai

 Det tok litt tid før eg kom meg ut i hagen for å dokumentere våren slik eg hadde planlagt.

 Rabarbraen ligg tre veker etter 2011.

Påskeliljer frå i fjor.  I år har eg handla så mange på ulike kupp at det burde bli mange neste år.

Og så tel vi ned: 6 dagar til opptur.

Det eg liker minst med strikking, er maskinsyinga.  Men det må til.  Tine Solheim sine metodar er ikkje dei enklaste, men resultatet vert deretter.

No skal eg strikke stolpar.  Ulempa med å strikke dei oppover er at dei ikkje strekker seg i høgda, om de forstår kva er meiner.  Ein må vere svært nøyaktig når ein syr dei på.  Fordelen er at ein strikkar belegg samtidig.  På den måten vert plagga fine på baksida, noko som sjølsagt er ein fordel om ein knappar dei opp.

Garnet til den korterma jakka kjøpte eg i fjor sommar.  Etter at eg strikka den rosa, tok det tid før eg samla motivasjon til å gå på eit plagg med same type arbeid.

Eg prøvde å legge ut ein snutt frå YouTube før i dag.  Det gjekk ikkje så bra.  Men sjekk gjerne her.  Vi har det godt i Noreg i dag, også takka vere den franske revolusjonen. Sjølv får eg denne på hjernen kvar gong eg høyrer den.  Om tre veker kjem DVD-en.

30.april: Kom mai du skjønne milde.

I dag har vore ein innhaldsrik dag.  Arbeidsdagen varte til fire, der vi mellom anna planla opptur om ei veke. Det er turistforeininga som arrangerer for åttande steg.  Fjellet ser de på bildet. Vi får håpe på ei mild veke.

No har eg vore på kaffibesøk hos ei venninne før det vart tysdagstur rundt vatnet i fint opphaldsver.  Alt er relativt.  Sykkelturen heim frå jobb i dag var heller våt.

No kan vi gle oss til ein månad med mange fridagar.

Bok 18: De sørgende

I fjor sommar las eg dei fire første bøkene I Barbarottikvartetten.  Etter mitt syn er dette kvalitetskrim.

Gunnar Barbarotti var ein lykkeleg mann med kone, mine og dine born då ein anaurisme igjen råkar kona.  I "De sørgende" møter vi Barbarotti i djup sorg.  På kontoret gir dei han ei sak å jobbe med som dei eigentleg er ferdige med. Det er viktig for han å bli sysselsett.

Ein mann forsvinn.  Det viser seg at sambuaren hans tidlegare er dømd for eit grusomt mord der ho parterte liket.  Så politiet meiner det er ei opplagd sak.  Det er det sjølvsagt ikkje.  Men hendingar i fortid og notid heng sjølvsagt saman.

Nesser skriv glitrande.  Språket er frodig og svært godt.  Eg set pris på dei betraktningane han kjem med.  Menneska er godt skildra. Det bur mange lag i dei.

Til sist sit ein att med ein del moralske spørsmål som det ikkje er fasitsvar på.  Men oppklaringa er logisk og god.

Eg ser nokon seier at dette kanskje er den siste boka.  Her legg eg inn protest!  Eg fann minst eitt frampeik: Gunnar Barbarotti skal finne far sin.

Regnverssøndag

Vi har kome til den årstida fotballen styrer mykje.  Det vart tidleg middag, for journalisten skulle til Molde.  Menyen var enkel, karbonadar, omnsbakte potetbåtar og woka grønsaker.

Turen min vart etter middag i dag.  Eg stakk innom skulen for å lage eit gloseøveark, trudde eg.  Men det starta å høljregne, så eg vart der og jobba til det vart moderat regn att.  Resten av gjengen hadde då fare på Høddkamp.  Eg nytta høvet til å lese ut ei bok medean det var fredeleg i heimen.

No skal eg skrive eit referat før eg tek kvelden.  Eg håper dei har fått sin daglege dose med fotball, så vi kan få sett ein film.  Elles har det vorte ein vane å sjå Kongsvoll Videregående søndagane.  Det er ein fin start på skuleveka!  Eller veke?  Det vert nokre "halve" veker no i mai.  Vi får ønskje oss fint ver.  I går fekk eg meg eit par timar i hagen.  Det viser att, men eg har mykje meir eg har lyst å gjere - i fint ver.

Klippekrans

Eit skuleår går fort, og no har vi allereie kome til klippekrans.  Eg synest det er greitt at elevane får bake gjærdeig fleire gongar slik at dei vert trygge på det.  Vi har arbeidd oss gjennom grove rundstykke, fletteloff, grovbrød med pose og no til slutt klippekrans.  Det er enkel og rimeleg mat, men kva smakar betre enn varmt kveitebrød?

Dette er ei skulekjøkenoppskrift.  Bakar ein heime med maskin, kan ein godt ha i romtemperert smør i bitar til slutt i deigen.

Deig
1/2 pk (helst raud) gjær
2 dl lunken mjølk
4-5 ms flytande margarin (her smeltar eg smør)
4 ms sukker
1/2 ts kardemomme
ca 5 1/2 dl kveitemjøl

Fyll:
2 ms mjuk margarin/smør
2 ms sukker
1 1/2 ts kanel

1. Smuldre gjæren i ein bakebolle.  Ha i mjølka.
2. Ha i resten av ingrediensane og rør godt.
3. Hev deigen til dobbel storleik.
4. Kjevle deigen til eit rektangel omtrent på storleik med ei bakeplate.
5. Smør eit tynt lag med smør utover deigen og strø over sukker blanda med kanel.  Rull saman.
6. Form ein krans. Klipp djupt i kransen og legg "blada" vekselvis mot høgre og venstre.
7. Hev kransen til dobbel storleik.
8. Pensle gjerne med egg før du steiken kransen på 220 grader i 15-20 minutt.

Herleg med helg!

 Etter ei heller travel veke er det godt med helg. Sola skin, så ein kan håpe på høve til hagearbeid og utekos. Det er fotballkamp og jentekveld.  Russen har begynt å røyve på seg.

Eg har kjøpt meg ein ny "voksduk" til kjøkenbordet, men sidan eg hadde kjøpt ein plante som passa til den, får eg vente med å skifte til eg kan ha både duk og plante ut.

Eg har tre til slike blå klokkeplantar som eg skal plante ut i næraste framtid.Og så skal det bli spennande å sjå om dei eg planta ut i fjor, har overlevd vinteren.

Påskekrim 2013

Insider (På innsida)	37,5%
Injustice (Blodig urett)	12,5%
Lewis	50%
The town	0 (0%)
Mordene i Fjällbacka	0 (0%)
Ser ikkje krim	0 (0%)

I mi svært uhøtidlege meiningsmåling om årets påskekrim kom det ikkje inn så mange stemmer, og no begynner dei å forsvinne.  Då må ein tru det er på tide å lagre meiningsmålinga.  No har eg gjort det om til prosent, og då ser det ikkje så ille ut.

Det viser seg at mine lesarar liker Lewis best 50%, tett følgd av Innsider 37,5%.

Bok 17: Brødrene fra Iron House

Dette er den tredje krimromanen eg les av forfattaren, og då har eg visst lese alle.  Dei to første er "Ved elven" og "Det siste barnet".

Hovedpersonen i romanen, Michael, er den sterke av to brødre.  Dei har vore på barneheim sidan dei vart funne i skogen som småbarn.  Han tek på seg skulda for eit drap broren har gjort.  Det gjer han, og så stikk han.  Mafiaen tek seg av han.

Eg får stoppe der.  Handlinga er tettpakka.  Romanen er ein thriller, og han er spennande frå byrjing til slutt.  Historia er kanskje litt vel brutal og urealistisk. Ein misser fort talet på drap, for å seie det sånn.  Slutten er derimot temmeleg amerikansk i den forstand at forfattarane ikkje greier å sette punktum i tide, om de forstår kva eg meiner.

Lesestoff

 Eg har eit luksusproblem for tida, nemleg rikeleg med lesestoff.  Desse lånte eg på bybiblioteket i går.

Desse har eg lånt av ein krimkompis.

I tillegg sikra eg meg nokre titlar i Ørsta.  No kan eg berre ønskje meg nokre friettermiddagar og dagar.  Lydbøkene kan kombinerast med praktisk arbeid, gjerne i hagen.  Og papirutgåvene høver godt i solveggen.

No har eg akkurat kome heim frå ein heller frisk tur rundt vatnet.

Pakke i posten

 I dag kom det ein pakke i posten.  Då eg såg fasongen på han, forstod eg med ein gong kva det var.

Det er ingen hemmeleg venn som har sendt pakken.  Eg reknar med at eg startar på prosjektet når det nærmar seg montering av den korterma jakka mi ein gong i neste veke.  Dei vert heilt sikkert ferdige til sommaren - då håper eg å møte avsendaren.

21. april

 I jakta på vårteikn i hagen fann eg i dag nokre primulaer.  Neste helg kanskje eg finn ein heil bukett i ulike fargar,

 Desse er også tidlege og trufaste.

Så spørs det om det vert rabarbra til grunnlovsdessert om knappe fire veker?  Eg har trua.